Iterambere ry’amahera bitcoin mu mwaka wa 2021 bisa n’ibiri inyuma yacu. Ayo mahera yo ku buhinga ngurukana bumenyi yarashikanye agaciro k’amadorari 70000 muri munyonyo umwaka uheze. Uno musi agaciro kayo kageze ku gice c’ako gaciro ko mu mwaka uheze. Ayo mahera yagumye aza aratakaza agaciro ku ndwi ku ndwi. Amahera yo ku buhinga ngurukana bumenyi rurangiranwa yagumye atakaza agaciro kugeza ku madorari 25424 imbere yuko ritekana bukebuke. Amahera yo ku buhinga ngurukana bumenyi akoreshwa cane atakaza agaciro ku Musi ku musi. Abahinga baritwararitse cane ico kibazo bakongera bakibaza ikibazo gikwirikira : Mbega bitcoin, Ethereum na Luna arashobora kuzosubira kuduza agaciro umusi uri izina? Abahinga bose ku masoko mpuzamakungu bafise amakenga.
Igituma ayo mahera yaragize ingorane, bituruka ku kuntu ayo mahera ata gihurumbirwa. Iduga ry’ibiciro kw’isi ryarateye ubwoba abanyamitahe, bahitamwo kutirukira ayo mahera yo ku buhinga ngurukana bumenyi bahitamwo gushira imitahe yabo aho bizeye. Nkuko babivuga ko ikibi kitaza ari kimwe, izimangana rya Terra ryaje ryunyura ibintu, ayo mahera yaritandukanije n’amadorari bituma Luna itakaza agaciro gose kuko Terra yari ishimikiro rya Luna.
Icaje nk’isanganya ni ikoroka ry’agaciro ry’amahera yitwa Coinbase: amahera yari yiganziye isoko ry’amahera yo ku buhinga ngurukana bumenyi muri Reta Zunze ubumwe za Amerika. Coinbase ryarataye agaciro bigaragara ko amadorari imiriyoni 430, urwo ruhombo rurarengeye na kure ukwo abasesanguzi bari bavyibajije. Inyuma y’ico gihuhusi Coinbase yaciye ivunjwa amahera make. Coinbase yaciye itera itakaza agaciro, itangura no kuva kw’isoko mu mwaka wa 2021. Ariko Coinbase ntiyatakaje icizere, ico gihuhusi ni icakanya Gato, kitazoteba guhagarara. Turihenze?
Nimba ayo mahera yo ku buhinga ngurukana bumenyi ariko arahungabana, abahinga bayo baribaza ikibazo co kumenya ko isoko ry’ayo mahera ryoba ryashikiriye ikiringo cayo cagahorera nk’uko vyari vyitezwe, bizwi nk’ugukanya bidasanzwe kw’amahera yo ku buhinga ngurukana bumenyi vyiswe kandi nk’umwaka w’urubura ku mahera yo ku buhinga ngurukana bumenyi. Uwitwa Simon Peters yabaye uwa mbere vyakozeko. Ni umuhinga mu bijanye n’ayo mahera ku rubuga e Terra. Niwe yamenyesheje ko ikiraje ishinga abanyamitahe b’ayo mahera ari ukumenya ryari ico gihuhusi kizohera. Ivyo bigaragazwa n’umwitwarariko cane cane mu bihugu vyo mu burengero wo kugerageza gusubiza hasi iduga ry’ibiciro ry’ibintu riguma rigaragara mu butunzi bw’ivyo bihugu. Amasoko y’imitahe aguma arondera aho yoshobora kuronka uburusho na cane cane ko tuzi ko mu kugabanya iryo duga ry’ibiciro hategerezwa kuduzwa urugero rw’inyungu navyo ntibinezera abanyamitahe ivyo vyose bigatuma ya mahera agira ikibazo.
Amakuru mashasha ntabwo yerekana ko hari ikigiye guhinduka. Uburusiya na Ukraine vyarasinye, mu gisagara ca Istanbul mu gihugu ca Turukiya, amasezerano yo kureka ama miriyoni y’amatoni y’ingano yari yugaraniwe mu kivuko ca Odessa n’abarusiya gushorwa hanze biciye mu kiyaga cirabura. Ariko ntibwakeye kabiri ibitero vy’abarusiya ku kivuko ca Odessa vyaciye bisubiza inyuma umwizero wari watanzwe n’amasezerano yari yasinywe. aba nyamitahe bagumanye umwiheburo. Intambara izohera itevye nayo izotuma ibiciro vy’ibifungurwa be n’igisata ca ntanganguvu biduga.
Ku ruhande rwiwe umuyobozi w’ibanki nkuru ya Buraya, umupfasoni Christine Lagarde yari yamenyesheje ko hari ibitagenda neza imbere gato yo gutera umukono ku masezerano ya Instanbul. Ku vyo yavuze kizobandanya igihe kitari gito yongerako kandi ko imisi iri imbere yo izoba mibi cane.
Eka nikigega c’isi yose kivuga uko. Ibiciro biguma biduga be n’urugero rw’inyungu ku ngurane. Ntacizere c’agahengwe kiriko kiraboneka, mu misi iza hoho bizogorana cane mu masoko. Abanyamitahe bipfuza kwunguka ntabazoba bagihurumbira ya mahera yo ku buhinga ngurukana bumenyi, bazoja mu bindi bitanga umwizero kurusha w’akunguko.
N’ubwo biri uko, intango y’intambara ya Ukraine yari yatumye abantu bibaza ko amahera nka bitcoin na ether azoduza agaciro kuko bibaza ko azoca acika nk’ubuhungiro, siko vyagenze ico ciyumviro camaze umwanya urume rumara, vyari ivyipfuzo, ukuri mu vyamasoko niko kwakoze amateka yakwo. Hambavu yiyo ntambara ya Ukraine hariyongerako ibindi biza ku rugero rw’isi yose. Twovuga nk’ingaruka ry’ikiza ça Covid-9 mu bushinwa, politike y’amahera yagoranye muri Reta zunze ubumwe za Amerika be n’iduga ry’ibiciro kw’isi nkuko twari twabivuze mu ntango. Ivyo vyose biri mu vyatumye amasoko ahura n’ibibazo. Izo ngorane zarashikiriye n’iyindi mitahe iri mu bindi hambavu y’iyo mitahe yo mu mahera yo ku buhinga ngurukana bumenyi. Ayo mahera ntaco yahinduye muri izo ngorane z’amasoko.
Ingorane Ayo mahera yagize zizobandanya zimare igihe kitari gito. Muri ibi bihe hari zuguruzuguru mu vya politike kw’isi, mu vy’ubutunzi, abanyamitahe ntibigerezako mu bintu babona bitagenda neza. Niyo mpamvu uno musi atari Salvador nta n’umwe yubahuka kugura ayo mahera yo ku buhinga ngurukana bumenyi ariko arata agaciro.
Dufatiye ku vyo abahinga benshi b’amasoko bavuga kw’isi, uko kuntu ayo mahera yifashe nabi bizomara igihe kitari gito. Intambara yo muri Ukraine irahitana abantu benshi cane cane abana n’abakenyezi, izohitana n’abandi kw’isi bishwe n’inzara. Muri uno mwanya, iyo ntambara iraboheye amaboko i mugongo ibijanye n’amasoko ariyo y’amahera yo ku buhinga ngurukana bumenyi.
Vyashizwe mu kirundi na E.N
